ලංකාව අමුතුයි

වෙනසක් බලාපොරොත්තු වුන ජනතාව අලුත් පක්ෂයකට ඡන්දෙ දුන්නේ අලුත් රටක් හැදෙයි කියන බලාපොරොත්තුව උඩ. ඒත් දැන් තිබුණටත් වඩා අන්ත රටක් බවට පත්වෙලා. හරියට කැහි ගෑණි දීලා හොටු ගෑණි ගත්ත වගේ වැඩක් තමයි වෙලා තියෙන්නේ. මිනිස්සුන්ට ඕන වුනේ තිබුණු ආර්ථික දේශපාලන සමාජීය ප්‍රශ්න වලට නව වැඩපිළිවෙලක් ලබා ගන්නයි. මිනිස්සු කඹලෙන් ලිපට වැටුනා වගේ. අද කන්න බොන්න දෙයක් නැති තරමට ජනතාව අන්ත අසරණ වෙලා. ඒවා ගැන රජයට වගේවගක් නෑ. 

ලංකාව ටිකක් අමුතුයි තමයි. වෙනින් රටවල් වල ප්‍රාරම්භනය, පුනරාවර්තයෙන් නුසුදුසු පුද්ගලයන් පාලන තනතුරු වලින් පලවා හරිනවා. නමුත් ලංකාවේ තත්ත්වේ ටිකක් වෙනස්.  අපේ රටේ ජන්දෙන් පරාද වුන අය තමයි අද ඉහල පුටුවල ඉන්නේ. ප්‍රජාතන්ත්‍රවාදය කියන්නෙත් විහිලුවක් කියලා අද දේශපාලන වේදිකාව  දකිද්දි හිතුන වාර අනන්තයි අප්‍රමාණයි. පොඩි උන් වගේ ගුටි ගහ ගන්නවා, අපි මේකේ අපි අරකේ කියාගන්නවා, එකම පක්ෂෙ අයම බෙදිලා වැඩ කරනවා. බලන් ඉද්දි මතක් වෙන්නේ මොන්ටිසොරියක්. රටේ තීන්දු තීරණ ගන්න තැන තත්ත්වය මෙය නම් රට අරාජික වීම ගැන මම මොකුත් කියන්නෙම නෑමයි. බඩු මිල මිනිස්සුන්ගේ බඩට ගහලා. වේලක් කාලා දෙවේලක් බඩගින්නේ ඉන්න තත්වයක් දැන් ලංකාවේ තියෙන්නේ. හෙට අනිද්දම පවුල් පිටින් පාරේ හිඟාකන්න වෙයි. එතකොට කෝටි ගනන් දීල වාහන ගන්න ජේතතුකාර මහත්වරු කීය කීය හරි හිඟන කැටේට දාලා යයි.

අද සංවර්ධනය කියන්නේ මොකක්ද කියලවත් සමහරු දන්නේත් නෑ. ඒවා එයාලට අදාලත් නෑ. කිසිම සංවර්ධනයක් කිසිම අතකින් වෙලා නෑ. පරාධීන ගැති මිනිස්සු ලංකාවේ බිහිවෙලා. පිටරට දේවල් ලංකාවෙන් බැහැර කරමු කිව්වොත් ලාංකිකයට ඉතුරු වෙන්නෙ නිරුවත විතරයි. මොකද අද යට කලිසමත් made in china  වෙන්න පු`ඵවන් ඉඩකඩ බොහොම වැඩී. අද වෙද්දි අපි ඒ තරමට අපිට දෙයක් කරගන්න බැරි නිකම්මු පිරිසක් වෙලා ඉවරයි. අනුන්ගෙන් ලැබෙනකම් විරිත්ත විරිත්ත  පාර බලන් ඉන්න අය තමයි අද ලංකාවේ ඉන්නේ. සිංහලේ කියලා නමට කිවුවට වැඩක් නෑ ඔක්කොම බඩු එන්නේ ලංකාවට පිටරටින් නම්. ලංකාව කියන්නේ සම්පත් ආකරයක්. ඒත් ඒවා අපේ රටේ අනන්‍ය දේවල් කරගත්තොත් අපිට මේ වැටිලා ඉන්න අරාජිකත්වයෙන් ගොඩ එන්න පු`ඵවන් වෙයි. දැන් ලංකාවේ තත්ත්වය වෙනස්. අන්තෝ ජටා බහි ජටා වගේ. ඇතුලත් ගිනිය පිටත් ගිනිය.

රාධිකා මධුවන්ති

කැළණීය විශ්ව විද්‍යාලය