හදවතට ගුණ දෙන ජීර්ණය පහසුකරවන පතෝල

පතෝල 

පතෝල කියන්නේ ඕනෑම ලෙඩෙක්ට බයක් සැකක් නැතුව දිය හැකි එළවලුවක්. ඒවාගේම පෝෂණ ගුණයෙන් ඉතාම ඉහලයි. පතෝල ග්‍රෑම් 100ක් ගත්තොත් කැලරි තියෙන්නේ 22යි. ඒ කියන්නේ කැලරි අඩු කෑමක්. මහත්වේවි කියලා බය අයට චකිතයක් නැතුව ම කන්න පුලුවන්. මේ එළවලුවේ මේදයයි කොලොස්ටරෝලුයි කොහත්ම නෑ. සෝඩියම් මිලිග්‍රෑම් 8ක්, පොටෑසියම් මිලිග්‍රෑම් 90ක්, ප්‍රෝටීන් ග්‍රෑම් එකක්, කාබෝහයිඩ්‍රේටි ග්‍රෑම් 3ක් පතෝල ග්‍රෑම් 100ක් තිබෙනවා. ඒ විතරක් නෙවෙයි කෙදි බහුල මේ ගුණැති එළවලු ග්‍රෑම් 100ක විටමින් ඒ සියයට 2ක් විටමින් සී සියයට 8ක් කැල්සියම් සියයට 3ක් වගේම යකඩ සියයට එකකුත් අඩංගුයි. මේ එළවලුවේ ඖෂධීය ගුණයත් ඊට දෙවනි නොවේ. ආයුර්වේදයට අනුව කෙදි සහිත නිසා මලබද්ධය ද සුවපත් කරනවා. අම්ලපිත්ත රෝගය හෙවත් ගැස්ට්‍රයිටීස් රෝගය ඇති අයට බඩ දැවිල්ලක් හා උගුර දැවිල්ලක් ඇතිවේ.දැවිල්ලත් එක්ක උගුරට එන වායුව නිසා සමහරු කෑම කන්නත් අකැමැතියි. පතෝල කියන්නේ ඒ අයට අපූරු කෑමක්.  සමහරුන්ට පවතින ඇගේ ලේ කෝප වීම් වලට පතෝල නියම කෑමක්. පතෝල ඇටවල පණුවන් නසන ගුණයකුත් තියෙනවලු. ඒනිසා පතෝල පුංචි දරුවන්ටත් ගුණයි.

පතෝල ගැන බටහිර වෛද්‍ය විද්‍යාවෙත් සදහන් වෙනවා. කෑම බීම හින්දා වගේම විවිධ හුරු පුරුදු හේතු‍වෙන් සිරුරේ විස එක්රැස් වෙනවා මෙන්ම සමහර විට විස වර්ග අලුතින් නිර්මාණය වෙනවා. පතෝල කෑවොත් මෙම විසත් නැති කරගත හැකියි. අපි ලෙඩ රෝග වලින් ආරක්ෂා වන්නෙ අප තුල ඇති ප්‍රතිශක්තිකරණ පද්ධතිය නිසාවෙනි. පතෝල ප්‍රතිශක්තිකරණය පද්ධතිය වැඩි දියුණු කර අප ලෙඩ රෝගයන්ගෙන් ආරක්ෂා කරනු ඇත. එපමණක් නොව ආහාර දිරවීමත් පහසුකරයි. දියවැඩියාව, කොලොස්ටරෝල් පාලනය කරයි. අපේ හදවත ආරක්ෂා කිරීමේ හැකියාව පතෝල වලට හිමියි. ආතතිය, පීඩනය වගේ තත්ත්වත් දුරු කරනවා.

එස්.ඩී.ආර්. මධුවන්ති

කැළණිය විශ්ව විද්‍යාලය